Mister, nagbigti dahil sa selos

MANILA, Philippines - Selos ang nakikitang  dahilan ng pagbibigti ng isang 25-anyos na mister sa loob ng kanilang bahay sa Tondo, Maynila.

 Sa report ni Det. Rodelio Lingcong ng Manila Police District (MPD)-homicide section, dakong 5:00 ng hapon nang nadiskubreng nakabigti ang leeg ng biktimang si Bernardo Salang ng 924 Gate 3 Area H, Parola Compound, Tondo gamit ang isang kumot ng kanyang live-in partner na si Dolores sa loob ng kanilang bahay.

 Ayon kay Aling Elvira, ina ng biktima, dalawang araw bago natagpuang patay ang biktima  ay nagkaroon ng mainitang pagtatalo ang biktima at live-in partner nito.

 Hinala umano ng biktima, may kinahuhumalingan ang kanyang live-in partner dahilan kaya halos gabi-gabi umano itong nagtatalo .

 Samantala, wala na ring buhay  si Edward Magio nang matagpuan ng kanyang landlady na si Janneth Pancho, 33 sa inuupahan nitong kuwarto sa Bgy. San Roque,  Navotas City, kamakalawa ng gabi.

Sisingilin sana ni Pancho  dakong alas-9:30 ng gabi ang biktima subalit hindi ito sumasagot kung kaya’t ginamitan niya ng “spare key” ang  pinto nito hanggang sa bumulaga ang nakabigting si Magio.

Inaalam na kung ano ang dahilan ng pagpapakamatay ng biktima at inaalam na kung may naganap na foul play sa nasabing insidente.