Holdaper sa jeep, arestado
MANILA, Philippines - Arestado ang isang holdaper habang nakatakas naman ang kasama nito matapos nilang biktimahin ang dalawang babaeng sakay sa isang pampasaherong jeep, kamakalawa ng gabi sa Caloocan City.
Nakilala ang nadakip na suspek na si Jhay Valte, 29, ng Sangandaan ng naturang lungsod habang inaalam na kung sino ang nakatakas na kasama nito.
Base sa ulat ng Caloocan City Police, naganap ang insidente alas-8:00 ng gabi, habang ang mga biktima na sina Sheina Mae Cortel, 21; at Reene Saludales, 24, ay lulan ng isang pampasaherong jeep kasakay ang mga suspect na nagpanggap na pasahero. Pagsapit sa Letre Road ay doon na naglabas ng patalim ang mga suspek bago nagdeklara ng holdap.
Kinuha ng mga suspek ang mga dalang gamit ng mga biktima bago nagsitakas.
Napansin naman ng mga nagrorondang mga tanod ang pagtakas ng mga suspect dahilan upang habulin ang mga ito hanggang sa masakote si Valte at mabawi ang mga tinangay sa kanilang mga biktima, habang nakapuga naman ang kasamahan nito.
- Latest
