Trader niratrat sa QC
MANILA, Philippines - Patay ang isang negosyante habang sugatan naman ang isang batang lalaki makaraang pagbabarilin ng hindi kilalang salarin sa Commonwealth Avenue, Quezon City, kamakalawa ng gabi. Kinilala ang nasawi na si Emerson Yap, 37, ng Riverside Unit 3, Brgy.Commonwealth, sa lungsod. Ito ay binawian ng buhay habang ginagamot sa FEU Hospital dahil sa tinamong tama ng bala ng baril sa ulo at tiyan.
Nasugatan naman sa insidente si Jay Marcus Policarpio, 10, elementary pupil ng nabanggit ding barangay.
Ayon kay SPO1 Alejandro Camacho ng QC Police District Station 6 Batasan, naganap ang insidente sa harap ng puwesto ng biktima sa Lee Hoi Yee Lugawan sa Riverside St., Unit 3, Commonwealth,QC dakong- 11:35 ng gabi.
Sinabi sa ulat na nakatayo sa harap ng kanyang puwestong lugawan ang biktima nang biglang dumating ang isang suspek na tinatayang nasa 25 hanggang 30-anyos, 5’6’’ hanggang 5’8’’ ang taas, naka t-shirt na puti at maong pants at armado ng baril saka pinagbabaril ang biktima.
Tumakas naman ang suspek matapos ang pamamaril patungo sa direksyon ng Commonwealth. Patuloy pa ring sinisiyasat ang naturang insidente.
- Latest
