Libu-libong unclaimed plates sa MMDA, gagawing bangka

MANILA, Philippines - Pinag-aaralan ng Metropo­litan Manila Development Authority (MMDA) na i-recycle at gawin na lamang rescue boats ang libu-libong plakang nakumpiska nito upang mapakinabangan at hindi ma­sayang.

Sinabi ni  MMDA Chairman Francis Tolentino, kung sila aniya ang masusunod nais na nilang tunawin ang may 22,628 na plakang nakum­piska upang gawin na lamang itong bangka. 

Ngunit, kailangan pa nilang humingi ng pahintulot sa COA at oras na sila’y pagbigyan ay maari umano itong simulan.

Nabatid, na una nang isina­publiko ni Tolentino ang kabuuang 22,628 na nakumpiskang plaka ng ahensiya mula taong 1994  hanggang 2004 na hindi na kinuha ng mga may-ari  at ito’y nabubulok na umano sa kanilang tanggapan.

Sa kabuuang bilang, 4,595  dito ay dahil sa illegal parking, sinundan ng reckless driving na umabot 4,017; un­registered vehicles, 3,238; out of line, 2,757; at colorum, 2,184.

Ang malaking bilang umano ng unclaimed plates o hindi na kinuha ay mula sa motorsiklo na 7,494; private vehicles, 5,800; public utility jeepneys (PUJs), 4,584; buses, 3,700; trucks, 700; at AUVs, 350.