Truck salpok sa poste: 3 sugatan

MANILA, Philippines - Tatlo katao ang sugatan nang ang sinasakyan nilang truck ay sumalpok sa poste ng MERALCO sa Quezon City, kahapon ng umaga.

Kinilala ni Chief Inspector Enrico Figueroa, hepe ng Quezon City Police District-Traffic Sector 4, ang mga biktima na sina Fredelin Logro, 36, truck driver, ng Mandaluyong City, at mga kasamahang sina John Rey Logro, 17, at Noel Malinao.

Naipit umano ang katawan ni Fredelin sa bakal at tumagal ng halos 2 oras bago tuluyan siyang maalis dito ng mga rescue team.

Nangyari ang insidente sa may north-bound lane ng Araneta Avenue corner Baloy St., Brgy. Doña Imelda, ganap na alas-5:30 ng umaga.

Minamaneho ni Fredelin ang mini-dump truck (BCL-402) at tinatahak ang Araneta Avenue nang biglang mawalan ito ng kontrol at tinumbok ang bakal na poste ng MERALCO sanhi para sila masugatan.