Biktima ng holdap, natagpuang patay

MANILA, Philippines - Isang bangkay ng lalaki na may saksak sa dibdib ang natagpuan malapit sa isang chapel sa lungsod Quezon kahapon ng madaling-araw.

Ayon kay PO2 George Caculba, walang nakuhang pagkakakilanlan sa biktima na inilarawan  sa pagitan ng edad 30-35, payat, nakasuot ng striped na t-shirt, maong na pants, at shorts.

Ang biktima ay nadiskubre, alas-2:45 ng madaling-araw malapit sa St. Peter Memorial chapel, Tullahan Bridge, Brgy. Gulod, Novaliches sa lungsod.

Ang barangay official na rin ang tumawag sa pulisya  para sa pagsisiyasat.

Malaki ang hinala ng pulisya na posibleng biktima ng holdap ang biktima. Patuloy ang imbestigasyon ng awtoridad sa nasabing insidente.