Misis inutas sa lamay ng tiyahin

MANILA, Philippines - Bulagta ang 33-anyos na misis matapos ratratin ng di-kilalang lalaki sa pasugalan sa lamay ng kanyang tiyahin sa Balut, Tondo sa Maynila kahapon ng madaling araw. Siyam na bala ng baril ng tumapos kay Mary Rose Flores ng #96 A. Nepa Street sa nasabing lugar. Sa ulat ni SPO1 John Charles Duran ng Manila Police District-Homicide Section, naganap ang krimen dakong alas-2 ng madaling araw sa nasabing lugar. Sa imbestigasyon ng pulisya, pumupusta ang biktima sa sugalan nang ratratin ng gunman na nagpanggap na pumusta kung saan nagpulasan ang mga tumataya. Naiwang duguan ang biktima kung saan isinugod pa sa Tondo General Hospital subalit hindi na umabot ng buhay. May nakapagbigay ng impormasyon na ang gunman ay naglakad patungong San Rafael Village matapos ang pamamaril.