Jeep vs bus: 9 sugatan

MANILA, Philippines - Sugatan ang siyam na katao nang sumalpok ang isang pampasaherong jeep sa sinusundan nitong Mersan bus sa kahabaan ng tinaguriang “killer highway” sa Commonwealth Avenue sa may Philcoa, Quezon City.

Alas 9:10 kahapon ng umaga nang maganap ang pagbangga ng pampasaherong jeep na may plakang TWR 788 sa Mersan bus na may plakang UVN 403 sa naturang lugar.

Nabatid na nakahinto ang naturang bus para magbaba at magsakay ng pasahero ng bigla itong banggain ng jeep na sinasabing nawalan daw ng preno. Galing ng Tunangko, Bulacan ang bus at papunta sana sa Baclaran area.

Agad dinala sa East Avenue Medical Center ang mga nasugatan na karamihan ay pasahero ng jeep.

Nahaharap sa kasong reckless imprudence resulting in damage to pro­perty and multiple phy­sical injury ang driver ng jeep.