Bebot tinodas sa bangketa

MANILA, Philippines - Nadiskubreng patay na ang 35-anyos na babae nang balikan ng kanyang live-in partner  sa tinutulugang  plywood sa bangketa sa ilalim ng Delpan Bridge, sa Tondo, Maynila, kahapon ng madaling araw.

Ang biktima ay kinilalang si Liwayway Rigo,walang permanenteng tirahan.

Sa ulat ni SPO3 Glenzor Vallejo ng Manila Police District-Homicide Section, hinihinalang binagsakan ng tipak ng bato o pinukpok ng mabigat na bagay sa ulo dahil halos mabiyak na ang bungo ng biktima nang datnan ng live-in partner na si Steve Quintana,  alas-3:00 ng madaling-araw.

Nabatid na iniwan ni Quintana ang ka-live dakong alas 9:00 ng gabi upang mangalakal ng basura.

Bago umano umalis ang lalaki, nagsabi pa ito  kay Quintana na natatakot ito, patungkol marahil umano sa nasa paligid na lalaking lasing na umaali-aligid sa kanya.

Maaaring may adik o lasing na nais sumalbahe sa natutulog na biktima  subalit wala  umanong nais  magsalita sa lugar. Inilagak na ang bangkay sa Nathan Funeral para sa awtopsiya at safekeeping.