Binata patay sa tibo na ‘stalker’ ng nobya

MANILA, Philippines - Isang 23-anyos na binata ang nasawi nang saksakin ng dalawang ulit sa dibdib ng isang tomboy na ‘stalker’ ng nobya ng una sa Sampaloc, Maynila, kamakalawa ng gabi.

Dead-on-arrival sa Ospital ng Sampaloc ang biktimang si Robert Carillo, residente ng Pedro Gil St., Sta. Ana, Maynila.

Arestado naman ang suspek na si Annalyn Salcedo, 22, ng Sampaloc, Maynila.

Ayon sa suspek, maglalaban sana sila ng biktima sa Abril 28 pa subalit sumugod umano ang biktima kamakalawa pa lamang at naghamon na tapusin na ang laban para sa pinag-aagawang 15-anyos na dalagita. 

Aminado naman ang suspek na nagdilim ang kanyang paningin at nasaksak niya ang biktima nang tadyakan siya nito. Sa ulat ni PO2 Dennis Turla ng Manila Police District-Homicide Section, dakong alas-10:30 ng gabi kamakalawa nang maganap ang pagtutuos sa  Piña Avenue, Sampaloc, Maynila.

Agad namang rumesponde sa nasabing komosyon ang mga barangay tanod at nadakip ang suspek, habang ang kasama nito na isang Marilyn Motol ay mabilis na naglaho  sa lugar.

Naging ugat  umano ng pag-aaway ng biktima at suspek ang pangungulit ng huli sa dalagita na nobya na ng una, na bukod sa pagiging ‘stalker’ umano sa eskuwelahan ay panay din ang pangungulit hanggang sa Facebook.

“Si Robert talaga ang boyfriend ng anak ko, sumisingit lang ’yang tomboy, kahit sa eskuwelahan laging nakabuntot. Sa Facebook nagsimula ’yung pag-aaway nila,” ayon sa ama ng dalagitang pinag-aagawan.

Samantala, habang nasa himpilan na ng pulisya ay nasugatan ang ulo ng suspek nang nagngingitngit ng mga kaanak ng biktima nang madampot ang isang maliit na bakal gamit sa ‘fingerprinting’ at ipukol sa kanya.