Stude timbog sa ecstacy

MANILA, Philippines - Isang estudyante ng De La Salle University na nagbebenta ng ecstacy ang nadakip matapos ang isang buy-bust operation sa Malate, Maynila kama­kalawa. 

Sa report  ni PDEA Special Enforcement Service Director Jeoffrey Tacio, ki­nilala ang suspek na si Prahbijot Gill, Indian, 18, residente ng Antipolo St., Sampaloc, Maynila.

Ayon sa report,  pasado alas-2:00 ng hapon noong Lunes, nagsagawa ng buy-bust ang nagsanib na puwersa ng PDEA at MPD Station 9 sa East Tower, One Archers Place sa Taft Avenue, Maynila, malapit lamang sa DLSU.

Nakumpiska sa suspek ang 223 na piraso ng ecstacy na nagkakahalaga ng P334,550.

Sa imbestigasyon ng pu­lisya, ang naturang Indian ay malaking supplier ng illegal droga sa Metro Manila at sa Region 3 at karamihan umano sa mga binebentahan ay mga ma­yayamang estudyante.

Ang suspek ay sasa­ilalim sa inquest proceedings­  sa kasong paglabag sa Republic Act 9165, o Comprehensive Dangerous Drugs Act of 2002, isang uri ng non-bailable case.