Bus nagliyab sa ilalim ng Skyway

MANILA, Philippines - Sugatan ang isang bus driver matapos magliyab ang minamaneho nitong sa­sakyan sa south-bound ng Skyway, South Luzon Express­way (SLEX), Muntinlupa City kahapon ng umaga.

Nilalapatan ng lunas sa Ospital ng Muntinlupa ang biktimang si Randy Alle­ne­gue, at driver ng  Alps Bus na may plakang DXB-157. Suwerte namang walang na­disgrasya sa mga pasahero nito.

Ayon kay Virgilo Dupaya, traffic enforcer ng Skyway Management, naganap ang insidente alas-6:00 ng umaga sa south-bound, ilalim ng Sky­­way malapit sa Alabang, Muntinlupa City habang mina­maneho ni Allenegue ang naturang bus. Nabatid na ayaw umanong umikot ang  hulihang gulong ng bus sa bandang kanan kaya huminto ang driver.

Nang tingnan ito ni  Allene­gue, nag-aapoy na ang gulong kaya dali-dali niya itong binuhusan ng tubig ngunit biglang sumabog at nagliyab ang bus.

Ligtas naman ang lahat ng pasahero ng bus na agad na bumaba. Alas-6:41 ng umaga na nang maapula ang apoy.

Sanhi ng  insidente, halos nagmistulang parking area ang naturang lane dahil sa  matinding trapik  na umaabot na sa bahagi ng Bicutan, Taguig City.