Binata kinatay ng half brother

MANILA, Philippines - Patay ang isang binata ma­­­karaang pagsasaksakin ng kanyang half brother matapos magtalo sa hiniram na audio speaker ng huli sa kanilang tatay sa lungsod Quezon. 

Si Joseph Rico, 29, ay na­gawa pang maisugod ng kaanak sa ospital, subalit hindi na rin umabot pang buhay dahil sa saksak sa dibdib at sikmura, ayon kay SPO1 Cristituto Zaldarriaga, may-hawak ng kaso. 

Ang suspek na kanyang half brother na si Jimmy Ca­bojaje, 32, ay mabilis na tuma­kas makaraan ang krimen.

Nangyari ang insidente sa  harap ng kanilang bahay sa Phase 2, Lupang Pangako, Brgy. Payatas B, ganap na alas-8 ng gabi.

Bago ito, nagpunta umano si Rico sa bahay ng kanyang tatay-tatayan na si Francisco Rico para hiramin ang mga speaker nito para magamit sa kanilang radyo.

Subalit, tumanggi si Francisco dahilan para magalit ang suspek at nagbitaw ng ma­anghang na salita sa una.

Kamakalawa nga ng gabi habang nag-iinuman ang biktima at ang suspek sa ikalawang palapag ng kanilang bahay, nagkaroon ang mga ito ng pagtatalo.

Upang maiwasan ang ma­init na pagtatalo, nagpasya ang biktima na umalis, su­balit binato siya ng suspek ng bote ng alak at tinamaan sa kanang paa.

Dahil dito, binalikan ng bik­tima ang suspek, pero sinalubong na siya ng saksak ng huli sa dibdib. 

Nang bumuwal ang biktima, ay muli itong sinaksak ng suspek sa sikmura.

Pero kahit sugatan, na­gawa pang makatakbo ng biktima at makahingi ng tulong sa mga kaanak kung saan itinakbo ito sa Fairview Ge­ne­ral hospital pero, habang ginagamot ay binaiwan din ng buhay.