Truck driver binurdahan ng bala

MANILA, Philippines - Patay sa pitong tama ng bala ng baril ang isang de­livery truck driver makaraang ratratin ng hindi nakikilalang salarin sa Moriones, Tondo, Maynila, kamakalawa ng gabi.

Kinilala  ang biktima na si Ricky Boa, 29, ng Palsara, Balete, Batangas, na nag­deliver lamang ng mga panindang kalamansi sa lugar.

Naganap ang insidente dakong alas-9:41 ng gabi kamakalawa sa may panulukan ng Carmen Planas at P. Herrera Sts. Tondo, Maynila.

Tikom umano ang mga bibig ng mga dinatnang residente ng mga awtoridad sa crime scene kaya’t umaasa na lamang sa kopyang nakunan ng closed circuit tele­vision (CCTV) sa lugar ang inisyal na pagbabatayan sa insidente upang makilala ang suspect.

Sa nakitang  pangyayari  sa video, naglalakad ang biktima matapos magdis­karga ng mga kalamansi nang sabayan ng hindi nakilalang lalaki sa bahagi ng P. Herrera patungo ng Carmen Planas kung saan bigla itong pinaulanan ng bala ng baril.

Wala naman umanong nawawala sa mga gamit ng biktima kaya inaalis ang anggulo ng  holdap.