Binatilyo binoga ng bebot, utas

MANILA, Philippines - Dead-on-arrival sa pagamutan ang isang 16-anyos na binatilyo nang barilin sa dibdib ng hindi pa kilalang babae  na sakay ng isang taxi, sa Pandacan, Maynila, kamakalawa.

Kinilala ang biktimang si Jonel Macaraeg, residente ng E. Carlos Candida st., Pandacan, Maynila.

Iniimbestigahan pa ang sinasabing babaeng namaril sa biktima, na tumakas matapos ang pamamaril.

Sa ulat ni SPO1 Charles John Duran, ng Manila Police District-Homicide Section, bandang alas-10:30 ng umaga nang maganap ang insidente sa panulukan ng Candida at Pres. Quirino Avenue  sa Pandacan.

Sa ulat, nakatayo ang binatilyo sa naturang lugar nang may dumaan na isang taxi na hindi  naplakahan.

Huminto ang taxi sa tapat mismo ng biktima  kung saan nagbukas ng pinto ang sakay na babae at walang sabi-sabing binaril ang binatilyo.

Nagtamo ng tama ng bala ng baril sa kanang dibdib ang biktima na tumagos sa likod at naging dahilan ng kanyang kamatayan. Ang insidente ay nasaksihan ng kapatid ng biktima na si Shirley Liwanag, 26, na nagdala sa biktima sa Ospital ng Maynila, kung saan ito idineklarang patay.