‘Salisi’ sa ospital, timbog

MANILA, Philippines - Arestado ang isang 25-anyos na lalaki  na miyembro ng “salisi gang” nang ma­aktuhan sa pagnanakaw ng cellphone sa isang pas­yente sa loob ng ward ng Philippine General Hospital (PGH) sa  Ermita, Maynila, kahapon ng umaga.

Nakapiit na sa Manila Police District (MPD)-Theft and Robbery Section ang suspect na si Roldan Demo, alyas “Dan”, ng Block 31, Area II, Sapang Palay, Del Monte, Bulacan dahil sa reklamo ni Karren­ Callao, 21, ng Tambo, Parañaque City.

Ayon kay PO3 Ferdinand Leyva ng MPD-Station 5, dakong alas-8:00 ng umaga­ nang maaresto ang suspect habang papalabas ng  Ward 15, ng PGH.

Nabatid na natutulog ang biktimang bagong panganak sa Bed 14 nang ma­alimpungatan sa kaluskos at naaktuhan niya ang suspect na ginagalaw ang kanyang bag.

Nang kanyang lingunin ay nakita ang pa­paalis na suspect at wala na ang kanyang  Lenovo cell phone, na ipinasa sa kasama niyang babae saka mabilis na lumabas ng ward. Agad naman siyang inaresto ng ru­mespondeng security  guard ng ospital. Hindi na narekober ang cell phone na na­tangay ng kasabwat ng suspect.