Motorsiklo vs truck: 1 patay, 1 sugatan

MANILA, Philippines - Isa ang patay, habang isa pa ang sugatan   sa salpukan ng isang motorsiklo at isang truck sa Regalado Avenue lungsod Quezon, ayon sa pulisya kahapon. Nakilala ang nasawi na si Nathaniel Tadili, 25, residente ng Molave, Edsa Fairview, habang sugatan naman ang  kasamahan nitong si Crisam San Gabriel, 22.

Nasa kustodiya naman ng Traffic Sector 5 ang driver ng Elf Truck (UFF-962) na si Escarla Fortuna, 34. Nangyari ang insidente sa may intersection ng Regalado Avenue ganap na alas-12:30 ng mada­ling araw habang  sakay ng kanilang motorsiklo (NM-9395) ang mga biktima na minamaneho ni San Gabriel galing Regalado Extension nang biglang sumalpok   sa truck na tinatahak ang northbound lane ng Commonwealth Avenue patungong Novaliches.

Sa lakas ng pagkakasalpok, ay tumalsik umano sa kalsada si Tadili saka bumagsak sa semento, habang si San Gabriel naman ay kasama ng motorsiklo na pumailalim sa truck.

Dahil dito, nagtamo ng matinding pinsala sa buong katawan ang mga biktima na ikinamatay din ni Tadili.   Inihahanda na ang kasong reckless imprudence resulting in homicide at serious physical injury laban sa driver ng truck.