Rider tuhog sa bakal, patay

MANILA, Philippines - Nasawi sa pagamutan ang isang motorcycle rider makaraang matuhog ang kanyang katawan ng bakal na karga ng isang delivery van makaraang sumalpok siya rito, kahapon ng madaling-araw sa Parañaque City.

Nakilala ang biktima na si Dorotheo Rodri­guez, residente ng Pa­lanan, Makati City. Bukod sa tusok ng bakal sa katawan, nagtamo rin ito ng grabeng pinsala sa ulo.

Lumabas sa pagsisiyasat, tinatahak ng biktima ang kahabaan ng East Service Road dakong alas-5 ng madaling- araw lulan ng motorsiklo (3937 TJ) nang mawalan ng kontrol at sumalpok sa likurang bahagi ng nakaparadang Isuzu delivery truck (PJH-132)  sa harapan ng isang junk shop sa Iba Street.

Sa lakas ng pagka­kasalpok, pumutok ang ulo ng biktima kahit may suot pang helmet at tumusok sa kanyang katawan ang ilang mga naka­usling 10 mm. square bar na kabilang sa mga kargamento ng nakaparadang truck.

Kinumpirma ng ilang nakasaksi na masyadong mabilis ang patakbo ng motorsiklo ng biktima at nagtangkang mag-overtake sa sinusundang sasakyan ngunit nabulaga sa nakaparadang trak.