CCTV sa Maynila inutil

MANILA, Philippines - Inamin ni Manila Police District Officer in Charge Sr. Supt. Roberto Po na wala ng silbi  ang  milyun-milyong pisong halaga ng mga closed circuit television camera o CCTVs sa mga panguna­hing lansangan sa Lungsod ng Maynila.

Ayon kay Po, maging ang website ng MPD  ay hindi na rin gumagana  kaya mistulang wala na ring silbi.

Paliwanag ni Po, malaki ang naitutulong ng CCTV kaya kailangan aniya ng MPD ng P5 milyon  para mapa­litan ang mga obsolete hardwares  na dating nakalagay sa mga CCTV para muling mapaandar.

“Okay pa naman yong mga monitor kaso unti-unting nawala kasi kailangan ng pondo sa maintenance”, sabi ni Po.

Maging ang website  ng MPD  ay hindi na rin aniya  umaandar dahil sa kakula­ngan ng information tech­nology experts ng Philippine National Police (PNP) na magmamantine sana sa ope­rasyon ng website ng MPD.

Humahanap na rin aniya ng pondo ang Manila police para sa maintenance ng CCTV at website na malaki ang naitutulong para epektibong paglaban sa krimen.