Kelot tinodas sa internet shop

MANILA, Philippines - Patay ang isang 22-anyos na lalaki  nang tarakan sa dibdib ng lalaking nakatalukbong ng t-shirt ang mukha  habang ang una ay nag­lalaro sa loob ng internet shop  sa Tondo, Maynila, kahapon ng madaling- araw.

Patay na nang isu­­god sa Ospital ng Tondo ang biktimang si  Kim Charles Flores,  ng Torres Bu­gallon St., Tondo.

Inilarawan naman ang suspect sa edad na  18-22, may taas na 5’3’’ hanggang 5’6’’ at armado ng patalim.

Sa ulat ng pulisya, dakong ala-1:35 ng ma­daling-araw nang maganap ang insidente sa loob ng PESO Net Computer shop sa Int., 33 J. Planas St., Tondo.

Nabatid na habang naglalaro ng computer games ang biktima at live-in partner na si Gelyn Edem nang biglang  pumasok ang suspect na  nakasuklob sa mukha ang suot nitong t-shirt at dali-daling lumapit sa biktima at inundayan ng saksak sa dibdib bago mabilis na tumakas.

Isinugod ni Edem ang biktima sa ospital subalit idineklarang dead-on- arrival.