Dalaga pinalitan agad ng dating nobyo, nagbigti

MANILA, Philippines - Dahil sa labis na sama ng loob maka­raang ma­laman na may iba nang nobya ang kanyang da­ting boyfriend, isang da­laga ang nagbigti kahapon ng madaling-araw sa Ma­labon City.

Dead-on-arrival sa Pa­gamutan Bayan ng Malabon si Wendy Ann Francisco, 25, residente ng Naval St., Brgy. Ba­ritan­ ng nasabing lungsod.

Base sa  imbestigas­yon ng Malabon City Police, dakong alas-3:45 ng madaling-araw nang matagpuan ang biktima ng kanyang ama na si Manuel Francisco na nakabigti sa kanilang hagdanan gamit ang nylon­ cord.        

Mabilis na kinalas ng ama sa pagkakabigti ang  biktima at dali-daling dinala sa nasabing pa­gamutan,  subalit hindi na rin ito umabot ng buhay­.

Nabatid na bago ang insidente ay nagkaroon umano ng tampuhan ang biktima at ang boyfriend nitong si Patrick Ramirez,  na nauwi sa hiwalayan ilang linggo na ang nakalilipas.

Sinasabing nadis­kubre ng biktima na may iba nang kasintahan si Ramirez matapos makita sa Facebook ng lalaki na naging dahilan upang labis na sumama ang loob nito.

Nadiskubre rin sa Facebook account ng bik­tima ang pinadala  nitong mensahe kay Ramirez na nakasaad “Pagnaglaslas ka hindi effective kaila­ngan maubusan ka ng blood bago mamatay… try and tested kapag kut­silyo ganun din try and tested na… hindi ko pa na-try... But according to research in 4 minutes u might die” at may kasama pang picture nito na may nakatali ng nylon cord.

Masusing iniimbes­tigahan ng pulisya kung may foul play ang insi­dente.