Ilang bahagi ng EDSA isasara

MANILA, Philippines - Pinayuhan ng Metropolitan Manila Development Authority (MMDA) ang mga motorista na maghanap ng alternatibong ruta dahil isasara ang ilang bahagi ng EDSA Ave­nue bukas (Feb. 25) kaugnay ng pagdiriwang ng ika-27 anibersaryo ng People Power Revolution I.

Ayon kay MMDA Chairman Francis Tolentino, simula ngayong alas-2:00 ng mada­ling-araw ay isasara ang magkabilang lanes ng White Plains Drive para sa “Run for Juan”.

Alas-5:00 ng madaling- araw ang kahabaan ng EDSA north-bound bus lanes at ikat­long lane mula sa Julia Vargas hanggang Guadix Road tatlong lanes ng EDSA Ortigas flyover ay pansamantala rin isasara.

Isasara naman ang kabuuan ng EDSA north-bound lane mula sa Ortigas Avenue patungong Santolan simula alas-5:00 ng madaling-araw para sa anibersaryo ng People Power Revolution.

Pinayuhan din ng MMDA ang mga motorista na kumanan na lamang sa Julia Vargas patungo sa kanilang destinasyon o kaya ay dumaan sa EDSA flyover at kumaliwa sa Ortigas Greenhills, patungo sa kanilang pupuntahan.

Bukas Pebrero 25, bandang alas-12:01 ng hatinggabi isasara ang lanes 3 at 5 mula sa Corinthians hanggang Camp Aguinaldo gate 3 para sa platform construction at ma­ga­gamit ang isang lane ng White Plains Drive.

Payo ng MMDA sa mga motorista, kumanan sa Guadix Road patungo sa destinasyon sa EDSA flyover at kumaliwa sa Ortigas Greenhills.