Brgy. secretary dedo sa sariling boga

MANILA, Philippines - Palaisipan ngayon ng pulisya kung nagpatiwakal o aksidenteng nabaril ng isang barangay secretary  ang kanyang sarili noong Huwebes ng gabi sa Pasay City.

Kamakalawa ng gabi ay binawian ng buhay habang ginagamot sa Pasay City General Hospital (PCGH) si Eduardo Roque, 36, secretary ng Brgy. 121, Zone 12,  Tolentino St., sanhi ng tama ng bala sa kanyang kanang sentido.

Batay sa isinagawang imbestigasyon ng Station Investigation and Detective Management Section ng Pasay City Police, naganap ang insidente ay noong Huwebes,  dakong alas-10:00 ng gabi sa tapat ng Mary Rose Sari-Sari store, malapit sa bahay ni Roque.

Lumabas sa unang imbestigasyon, naunang nakitang hawak-hawak ng biktima ang isang kalibre .38 baril na hindi lisensiyado na nilalaro umano nito.

Makalipas ang ilang minuto, nakarinig na lamang ng isang malakas na putok ng baril at duguang human­dusay sa kalsada ang biktima.

Sinabi pa ng pulisya na hanggang sa ngayon ay hindi pa nila nakakausap ang pamilya ng biktima hinggil sa insidente at iniimbestigahan pa nila ang naturang kaso kung si Roque ba ay nagpa­tiwakal o aksidenteng nabaril lang nito ang sarili.