92 arestado sa iligal na paputok sa MM
MANILA, Philippines - Umaabot na sa 92-katao ang nasakote habang limang sasakyan kabilang ang truck na kargado ng illegal na paputok at pyrotechnics ang nasabat ng mga operatiba ng pulisya sa serye ng operasyon sa Metro Manila kahapon sa mismong bisperas ng Bagong Taon.
Ayon kay National Capital Region Police Office (NCRPO) Chief P/Director Leonardo Espina, alas-7 pa lamang ng umaga ay nagsimula ang operasyon ng arresting team ng pulisya kontra sa illegal na mga paputok at pyrotechnic sa iba’t ibang lugar sa Metro Manila bilang bahagi ng pakikiisa sa “Iwas Paputok” ng Department of Health (DOH).
Nasa 170 ang inilatag na operasyon ng pulisya kung saan kabilang sa mga naharang ay ang truck na kargado ng mga paputok at pyrotechnics na tangkang ipuslit papasok sa Maynila.
Kabilang sa karga ng truck ay 639 kahon na naglalaman ng 660 piraso ng piccolo, isa sa mga ipinagbabawal na paputok ng DOH na lubhang delikado lalo na sa mga bata.
Dalawa ring pick-up na may kargang firecrackers at pyrotechnics ang nasabat sa Quezon City kung saan apat pang sibilyan ang nakumpiskahan ng mga bawal na paputok.
Samantala, dalawa namang jeepney na naglalaman ng mga ipinagbabawal na paputok at pyrotechnic ang naharang ng Eastern Police District.
Anim-katao ang nadakma matapos makumpiskahan ng illegal na paputok sa magkakahiwalay na operasyon ng pulisya sa Valenzuela City kamakalawa ng gabi.
Sina Jayson Arabejo, 33; Emmanuel Mauhay, 19; at si Jessie Ariola, 33, ay nadakip sa kahabaan ng Barangay Road 1, San Miguel Heights kamakalawa ng gabi.
Samantala, si Jonalyn Suclan, 36, ng Caloong 2 St., Barangay Caloong ay nadakip din habang sina Henry Babasa, 23, ng Ba rangay Marulas at Manuel Feliciano, 46, ng Magsaysay St., Doña Ata Subdivision ay nadakip naman sa Pio Valenzuela Market.
Aabot din sa apat na stalls sa National Capital Region na nahuling nagtitinda ng mga malalakas at delikadong uri ng paputok ang ipinasara ni Espina na nagresulta rin sa pagkakaaresto sa 35 vendors.
Siyam na insidente ng indiscriminate firing ang naitala sa NCRPO kung saan siyam na baril at mga basyo ng bala ang nasamsam.
Patuloy namang nakaalerto at mahigpit ang monitoring ng kapulisan laban sa mga lalabag sa paggamit ng illegal na paputok. (Dagdag ulat ni Ricky Tulipat)
- Latest
