Carnapper bulagta sa pulis

MANILA, Philippines - Isang hindi pa kilalang carnapper ang napatay nang makipagpalitan ng putok sa mga awtoridad, habang itinatakas ang isang motorsiklo, sa Ermita, Maynila, kahapon ng umaga.

Inilarawan ni SPO2 Glenzor Vallejo, imbestigador ng Manila Police District-Homicide Section, ang nasa­wing suspect  na nasa edad 35-40, 5’8’’-5’9’’ ang taas, naka­suot ng kulay­ pink at white stripes t-shirt at  gray na short pants.

Naganap ang insi­dente dakong alas-5 ng umaga  sa  Governor Center Drive malapit sa panulukan ng P. Burgos   Drive,  Ermita, Maynila.

Nabatid na basta na lamang sinakyan at pinaandar ng da­lawang suspect ang nakaparadang motorsiklo  na  napuna ito ng mga naka-istambay na operatiba sa PCP Luneta  subalit huma­rurot ito sa direksiyon ng Taft Avenue.

Nagkataong may isinasagawang surveillance operation ang mga tauhan ni Sr. Insp. Rolando Lorenzo, hepe  ng CIty Hall Public Assistance   nang makitang papatakas  ang  dalawang suspect,  sakay ng   kulay blue na Yamaha Novo Mio  kaya pinara ito.

Sa halip na huminto, nagbunot ng baril ang back ride at pinutukan ang mga pulis bagamat tumama lamang sa kanilang  service vehicle na may plakang SFY-627 kaya ginantihan sila ng putok.

Nakatakas ang isa  pang suspect na nagmamaneho ng  motorsiklo habang bulagta naman sa kalye ang di pa kilalang suspect.