Meat shop hinoldap
MANILA, Philippines - Isang sangay ng Monterey meat shop ang hinoldap ng apat na armadong lalaki at natangay ang maghapong kita nito at maging ang mga gamit ng empleyado sa lungsod Quezon, kamakalawa.
Ayon sa ulat, ang hinoldap na meat shop na matatagpuan sa Mindanao Avenue, Brgy. Tandang Sora, QC ay pag-aari ng isang Reynaldo Nadar.
Apat na suspect na armado ng kalibre .38 at nagkunwaring mga kostumer ang nangholdap sa meat shop kung saan tumakas ang mga ito gamit ang isang taxi (TXU-788).
Naganap ang panghoholdap dakong alas-6:05 ng hapon nang dumating ang mga suspect at nang makakita ng tiyempo, biglang naglabas ng baril at tinutukan ang cashier na si Carol Llanes at kinuha ang kita ng shop na aabot sa P16,000 at assorted na karne na nagkakahalaga ng P800.
Hindi pa nasiyahan ang mga suspect, kinuha pa ng mga ito ang pera at gamit ng mga kawani saka mabilis na sumibat lulan ng kanilang get- away na taxi patungong Quirino Highway.
- Latest
