Sundalo natagpuang patay sa loob ng barracks
MANILA, Philippines - Isang sundalo ang nasawi matapos na magtamo ng bala sa sentido sa loob ng kanyang barracks sa sa Camp Aguinaldo sa lungsod Quezon, kahapon ng madaling-araw.
Ayon sa ulat ng Quezon City Police Criminal Investigation and Detection Unit, nakilala ang nasawi na si A1C Jayson Reporsado, 26, at naninirahan sa Fernando Airbase, Lipa, Batangas.
Sa pagsisiyasat ng pulisya, nangyari ang insidente sa loob ng barracks ng Military Police Battalion sa Camp General Aguinaldo ganap na alas-12:02 ng madaling-araw.
Sinabi ng testigong si Sgt. Julius Ferrer, nagising na lang siya ng makarinig ng putok ng baril na nagmula sa loob ng kanilang barracks. Dahil dito, nagpasya si Ferrer na bumangon at pinuntahan si Master Sgt. Fernando Asuncion para ipagbigay alam ang insidente.
Pagkabukas nila ng ilaw sa barracks ay nakita na lang nila ang biktima na nakahiga at duguan.
Agad nilang itinakbo ang biktima sa AFP Medical Center, pero idineklara din itong dead-on-arrival. Patuloy pa ang isinasagawang imbestigasyon sa kaso.
- Latest
