‘Kristo’ tigok sa sabungan
MANILA, Philippines - Isang kilalang kristo sa sabungan ang nasawi makaraang barilin ng hindi pa nakikilalang salarin habang nakaistambay sa kanilang lugar sa Pasay City kamakalawa ng gabi.
Nakilala ang nasawi na si Marlon Alindog, 30, residente ng no. 11-B Mary Luz St., M. Dela Cruz, ng naturang lungsod. Naisugod pa ito sa Pasay City General Hospital ngunit hindi na rin naisalba ng mga manggagamot dahil sa tama ng bala ng kalibre .45 baril sa katawan.
Sa inisyal na imbestigasyon ng Pasay City Police, naganap ang pamamaril dakong alas-7:45 ng gabi sa may Tripa De Turla sa may M. Dela Cruz St.
Ayon sa ilang saksi, bigla na lamang umalingawngaw ang isang putok ng baril at duguang bumagsak si Alindog.
Kaagad rumesponde ang mga tauhan ni P/Sr. Insp. Antonio Sotomayor, hepe ng PCP-5, kung saan nakuha sa lugar ng krimen ang isang basyo ng bala buhat sa kalibre 45 at cellphone na pag-aari ng biktima.
Sinabi ng kapatid ng biktima na si Maranilla Alindog, 32, madalas umanong makatanggap ng pagbabanta sa buhay ang kanyang kapatid sa cellphone buhat sa hindi kilalang suspect.
Blangko naman ang pulisya sa hitsura ng suspect dahil sa walang gustong lumantad na saksi sa krimen dahil sa takot na madamay at sila naman ang balikan ng mga salarin. (Danilo Garcia)
- Latest
