Sekyu todas sa 'Agaw armas gang'

MANILA, Philippines - Patay ang isang 30-anyos na security guard matapos na mabiktima ng mga hinihinalang miyembro ng ‘Agaw Armas gang’ habang nakaduty ito sa Tondo, Maynila kahapon ng madaling-araw.

Dead on the spot si John Golondrina, ng St. Stephen Se­curity­ Agency at residente ng Delpan St., Binondo, Manila sanhi ng tama ng bala sa katawan.

Inilarawan naman ang isa sa suspect na nasa pagitan ng edad 20 hanggang 25, nakasuot ng puting t-shirt, khaki na short pants at bull cap habang ang kasama nito ay nakasuot ng kulay itim na jacket, puting shortpants at may taas sa pagitan ng nasa 5’5-5’6, payat at naka tsi­nelas ng puti.

Sa report, dakong alas-3 ng madaling-araw nang ma­ganap ang insidente sa harapan ng Uni Glass Sewing Machine sa kanto ng Jose Abad Santos Ave., at Tayuman St., Tondo.

Nauna dito, naka-duty ang biktima sa nasabing tindahan nang lapitan siya ng isa sa suspect na nagkunwang nagtanong subalit walang sabi-sabing pinaputukan ang sekyu ng dalawang beses.

Bago tumakas ang mga biktima ay tinangay pa ang kanyang kalibre 38 na service firearm. 

Narekober sa crime scene ang dalawang basyo ng ka­libre 45 na hinihinalang ginamit sa pamamaril.