Ginang patay sa tarak, kargang sanggol nahulog

MANILA, Philippines - Patay ang isang 26-anyos na ginang makaraang tarakan sa dibdib ng kanyang kapitbahay, habang bukol naman ang tinamo ng kanyang sanggol na kalong nito at mabitawan, sa Tondo, Maynila, kamakalawa ng gabi.

Binawian ng buhay sa Mary Johnston Hospital ang biktimang si Rosalinda Caballes, may live-in partner at residente ng Building A, Unit 213 Sambahayan sa panulukan ng Ka­gitingan at Moriones Sts., Tondo, Maynila bunga ng tinamong saksak sa dibdib.

Ayon sa imbestigasyon ni PO3 Julieto Malindog, ng MPD-Homicide Section, bandang alas-9:35 ng gabi nang maganap ang insidente sa gilid ng Building A.

Nauna rito, katalo umano ng kapatid ng biktima na si Marilyn Pelagio ang isang Popong.

Nang dumating ang biktima na karga ang anak na 1 taon at 8-buwan pa lamang ay naka­alitan din nito si Popong dahil sa pagkampi naman sa kapatid hanggang sa umalis ang huli at sa pagbalik ay kasama nito ang isang alyas Ronel Corocoto, bayaw umano ng suspect.

Walang sabi-sabing sinaksak ni Popong ang biktima kaya nabitawan nito ang kargang anak.

Mabilis namang isinugod sa hospital ng mga kaanak ang ginang pero nalagutan ng hininga dakong alas-10:30 ng gabi.

Patuloy namang nagsasagawa ng follow-up operation ang pulisya para maaresto ang dalawang suspect.