Ex- Marine timbog sa carnap

 Manila, Philippines - Arestado ang isang dating miyembro ng Philippine Marines nang sumemplang matapos na tangayin umano ang isang motorsiklo, kamakalawa ng hapon sa Taguig City.

Nakilala ang suspect na si ex-Pfc. Hybert Jones Bais, 26, at residente ng Katipunan Village, Brgy. Western Bicutan.

Sa ulat ng Taguig Police, unang tinangay ng suspect ang isang motorsiklo na may plakang 8247-TR habang nakaparada ito sa harap ng bahay ng may-aring si Angelo Vergara sa Block 85 Lot 16 Phase 5 AFPOVAL, Taguig.

Sa pagmamadaling makatakas, nawalan ng kontrol at sumemplang sa may Bayani Road si Bais dakong alas-4:20 ng hapon. Tiyempo namang napadaan sa lugar si PO1 Ashley Gamulo, ng Southern Police District (SPD) kung saan isinumbong ng isang street sweeper ang pangyayari. 

Naghinala si Gamulo na may ginawang mali si Bais nang nagmamadaling sumakay ito sa isang pampasaherong jeep niyang hinabol na nagresulta sa pagkakadakip sa suspect.

Nakaditine ngayon sa SPD detention cell si Bais na nahaharap ngayon sa kasong carnapping.