Mag-asawa patay sa sunog

MANILA, Philippines - Hindi naghiwalay ma­ging sa kamatayan ang mag-asawang lolo at lola makaraang maipit at ka­samang matupok sa loob ng kanilang bahay na nilamon ng apoy, kamaka­lawa ng gabi sa Marikina City.

Kinilala ni Supt. Marcos Monday T. Valen, Marikina City Fire Marshal ang mag-asawang namatay na sina Feliciano Belen Jr., 77, at Melina Belen, 74, kapwa nakatira sa 20 Stardust St., Concepcion-2 ng lungsod.

Sa imbestigasyon ni PO3 Gremar dela Torre, dakong alas-10:05 ng gabi nang magsimulang lumiyab ang apoy mula sa master’s bedroom at mabilis na kumalat sa buong kabahayan.

Umabot ang sunog sa ikalawang alarma bago ito idineklarang fire out dakong alas-11:03 ng gabi. Tinatayang nasa P500,000 ang halaga ng mga ari-arian natupok ng apoy.

Base naman sa imbestigasyon ng Scene of the Crime Operatives (SOCO), namatay ang mag-asawang matanda sa suffocation na hinihinalang dahil sa edad ay kapwa hindi na nagawang makalabas ng bahay.

Patuloy naman ang im­­bestigasyon ng mga pa­matay-sunog upang mabatid­ kung ano ang pinagmulan ng naturang apoy.