Sekyu na sinumbong sa bisor na natutulog, namaril

MANILA, Philippines - Nasa kritikal na kondis­yon ngayon ang isang 29- anyos na lalaki nang barilin ng guwardiya na kanyang sinumbong sa supervisor nito na natutulog kamakalawa ng gabi sa Tondo, Maynila.

Ginagamot sa Tondo Medical Center si Jasson Patigayon, ng Kalakal St., Balut, Tondo dahil sa tama ng bala sa katawan habang nakilala lamang ang tumakas na suspect na si Baby Boy Cabarubas.

Sa report ng pulisya, alas-7:20 ng gabi naganap ang insidente sa Kalakal St., Balut, nang sitahin ng biktima ang suspect dahil sa pagtulog nito sa kanyang duty at pagka­tapos ay isinumbong pa ng una ang guwardiya sa kanyang superior na naging dahilan ng kanilang pag-aaway.

Dahil dito, ipinasya ng biktima na umalis subalit lingid sa kaalaman nito ay sinundan siya ng suspect at pinagbabaril.

Mabilis na tumakas ang suspect na ngayon ay pinag­hahanap na ng pulisya.