Freddie Aguilar nilooban

MANILA, Philippines -  Natangay ang tinatayang aabot sa 12,000 US dollar na nakalagay sa vault ng sikat na singer/composer na si Freddie Aguilar matapos na pasukin ang bahay nito ng hindi matukoy na magna­nakaw sa lungsod Quezon, iniulat kahapon.

Ayon sa pulisya, natuklasan ni Aguilar ang pagnanakaw ganap na alas-3, Linggo ng hapon sa kanyang tinutuluyan sa Avery St., Brgy. North Fairview sa lungsod.

Ang pera ay nakalagay sa loob ng isang vault na nasa master’s bedroom, kung saan ayon sa singer ay huli niyang nakita ang pera nang buksan niya ito ay noong August 20, 2012 ganap na alas-3 ng hapon.

Tanging ang pera lamang ang nakuha sa loob ng bahay.

Sa inisyal na pagsisiyasat ni PO3 Danilo Tuscano, lumilitaw na walang nakitang puwersahang pagpasok sa loob ng bahay ng mang-aawit dahil ang susian at combination lock ng vault ay intact, kaya naman naniniwala ang awtoridad na posibleng kilala nito ang magnanakaw na may alam sa kombinasyon ng numero ng vault o secret number code nito. Tanging ang may access lamang sa vault bukod kay Aguilar ang maaring mag­bukas nito at kumuha ng pera.

Dagdag nito, alam na ng singer kung sino ang responsable pero hindi pa umano nito sinasabi sa awtoridad.