MANILA, Philippines - Nabulabog ang masayang birthday party ng isang pamilya sa lungsod Quezon matapos na mag-gate crash ang tatlong armadong kalalakihang nagkunwaring mga pulis at holdapin ang may-ari ng bahay at ilang bisita nito, ayon sa ulat ng pulisya kahapon.
Ayon sa ulat ng Quezon City Police Station 9, natangayan ng mga mamahaling gamit at pera na tinatayang aabot sa P100,000 ang mga biktimang sina Arlene Tamayo, 42; Estrella Go, 40; Emerencia Tamayo, 50; Abet Castro, 50; at Emelia Cruz; 62; pawang mga residente sa naturang lungsod.
Sa imbestigasyon ni PO3 Rodolfo Ramos, nangyari ang insidente sa isang bahay sa K-8th St., Brgy. West Kamias, ganap na alas-3:30 ng hapon.
Diumano, masayang nagpa-party ang mga biktima sa birthday ng anak ni Arlene Tamayo, nang biglang sumulpot ang mga suspect na armado ng baril at nagkunwaring mga pulis.
Dito ay hinahanap umano ng mga suspect ang alyas Marlyn na umano’y illegal recruiter, bago pinagtutukan ng baril ang mga biktima at nilimas ang mga gamit at pera ng mga ito.
Nang makuha ang pakay ay saka nagsipagtakas ang mga suspect, patungo sa K-8th St., Brgy. Kamias.
Patuloy ang imbestigasyon ng awtoridad sa nasabing insidente.