Botika nilooban

MANILA, Philippines - Pinasok ng mga kawatan ang sangay ng isang sumisikat na botika kung saan nilimas ang mga electronics appliances nito, kahapon ng umaga sa Pasay City.

Dakong alas-6:45 ng umaga nang madiskubre ang naganap na pagnanakaw sa loob ng Generics Pharmacy na nasa Paradero Building sa Libertad Street, sa naturang lungsod.

Nadiskubre ang nakawan ni Lourdes Paradero, 64, may-ari ng naturang gusali. Nabatid na natangay ng mga magnanakaw ang computer monitor, computer CPU at isang “sub-whooper” ng naturang botika.

Ayon sa mga imbestigador, ginamitan ng isang bolt cutter ang padlock ng pintuan kaya nakapasok ang suspek sa loob ng botika. Hindi naman natangay ng mga magnanakaw ang pera na nakalagay sa kaha-de-yero kaya hinihinalang hindi organisadong sindikato ang may kagagawan ng panloloob.