Dahil sa inggitan sa suweldo, obrero sinaksak ng kasamahansa trabaho
MANILA, Philippines - Nasa kritikal na kondisyon ang isang construction worker nang saksakin ito ng kanyang kasamahan dahil sa inggitan sa suweldo kahapon sa Makati.
Ginagamot sa East Avenue Medical Center sa Quezon City ang biktimang si Mark Vic Cortez, stay-in sa McMont Gear Electromech Corp., na matatagpuan sa Madison Building, panulukan ng Sotto at Salcedo Sts., Legazpi Village, Makati City sanhi ng tinamong saksak sa tiyan.
Samantala, nakakulong naman ang suspek na si Regin Soriano, 34, ng nabanggit ding kompanya.
Naganap ang insidente dakong alas-2:10 ng madaling-araw sa isang inuman sa panulukan ng Dela Rosa at Amorsolo Sts., Legazpi Village, Makati City.
Nabatid na habang nag-iinuman ang biktima at suspek sa nabanggit na lugar at dahil sa pareho nang lasing ay nagkakulitan hanggang sa sinuntok ng biktima ang suspek. Dito gumanti ang suspek hanggang sa kumuha ito ng patalim at sinaksak ang biktimang si Cortez.
Nabatid na may matagal nang alitan sina Soriano at Cortez dahil naiinggit umano ang biktima na mas malaki ang suweldo ng suspek.
- Latest
- Trending
