Manila, Philippines - Naaresto ng pinagsanib na puwersa ng Manila City Hall Public Assistance (CHAPA) at PNP-AIDSOTF ang dalawang dayuhan na pinaniniwalaang mga drug trafficker sa isinagawang buy bust operation kahapon ng madaling-araw sa Binondo.
Kinilala ang mga suspect na sina Siu Ming Tat, 37, Chinese national at Lee Yoong Hoew, 37, Malaysian national.
Dakong alas-12 ng madaling araw nang pasukin ng mga awtoridad ang Room 315 ng Manila Chinatown Hotel sa panulukan ng Benavidez at Salazar Sts. sa Binondo, Maynila.
Dito nakuha ang tinatayang kalahating kilo ng shabu na nagkakahalaga ng P2 milyon.
Inaalam din ng mga awtoridad kung may kinaaanibang sindikato ang dalawa na ngayon ay dinala sa Camp Crame.