1 na namang sangay ng LBC, hinoldap

Manila, Philippines -  Isa na namang sangay ng LBC ang hinoldap ng isang armadong suspect kung saan natangay ang may P66,000 na halaga ng kita nito sa lungsod Quezon kamakalawa.

Ang sangay ng LBC ay matatagpuan sa #6 Mabilis St. corner V. Luna Road, Brgy. Piñahan sa lungsod.

Sinasabing nangyari ang panghoholdap ganap na alas-6:30 ng gabi.

Ayon kay Mill Grace Rivera, 29, at empleyado sa nasabing tanggapan, pumasok umano ang nag-iisang suspect na lalaki at nagpanggap na kostumer.

Pagkapasok sa loob, bigla na lamang umanong naglabas ng baril ang suspect at tinutukan si Rivera bago nagdeklara ng holdap.

Sa takot, agad na ibinigay ni Rivera ang pera na kita nito.