MANILA, Philippines - Limang miyembro ng grupong tinaguriang “Pikit Gang” na nambibiktima sa mga pampasaherong bus at jeep ang nasakote ng mga tauhan ng Pasay City Police matapos na biktimahin ang mga pasahero ng isang jeep, kahapon ng madaling-araw sa naturang lungsod.
Nakilala ang mga nadakip na sina Manolet Viernes, 24; Ramil Otazao, 19; Rolando Magbintang, 27, driver; Jeckly Bacud, at Luis Ferrer Ngo, 32, pawang residente ng Kalaanan, Caloocan City.
Sinampahan na ang mga ito ng kasong robbery ng mga biktimang sina Sharmaine Reyes at Andrea Santos, kapwa call center agent.
Nabatid na nagpapatrulya ang mga pulis dakong alas-2:30 ng madaling-araw nang mamataan ang kaguluhan na nagaganap sa loob ng isang pampasaherong jeep (TWX-572) sa panulukan ng EDSA Extension at F.B. Harrison Street.
Hindi na nakapalag ang mga suspek nang paligiran ng mga pulis sanhi ng kanilang pagkakadakip. Modus-operandi umano ng grupo na magpapanggap na pasahero at kapag nagdeklara na ng holdap ay papipikitin ang mga binibiktima upang hindi sila makilala. Kapag may hitsura umano ang babaeng biktima ay momolestiyahin pa muna ang mga ito.