Manila, Philippines - Isang binata na nakuhanan ng droga sa bulsa ang pinagbabaril at napatay ng hindi nakikilalang salarin sa lungsod Quezon kamakalawa ng gabi.
Sa ulat ng District Investigation Division (DID) ng Quezon City Police, nakilala ang mga biktima na sina Sannie Fontiveros, 40, ng Block 2, Lot 4, Grande Nitang 2, Brgy. Bignay, Valenzuela.
Ayon sa ulat, ang biktimang si Fontiveros ay natagpuang walang buhay at may mga tama ng bala sa katawan sa kahabaan ng Florentino St., Gulod, Novaliches, ganap na alas-11 ng gabi.
Nakita ang biktima ng isang Floralyn Dizon sa naturang lugar habang duguang nakahandusay ilang minuto makaraang makarinig umano ito ng mga putok ng baril mula sa kanyang bahay.
Narekober ng awtoridad sa lugar ang limang basyo ng 9mm, isang slug at kitchen knife na iniwan sa tabi ng biktima.
Samantala, pasado ala-1 ng madaling-araw naman nang matagpuang walang buhay ang biktimang si Jonel Mamarinta sa may kahabaan ng Maximo Viola St., corner Sto. Domingo St., Brgy. Balingasa sa lungsod.
Si Mamarinta na tadtad ng tattoo sa katawan ay kinilala ng kanyang nanay na si Aling Virginia. Nakabalot ng masking tape ang ulo ng biktima at may nakatarak pang ice pick sa tagiliran at dibdib nito nang matagpuan ng isang Florencio Cabalquinto, barangay official sa lugar.
Gayunman, pinalalagay na itinapon lamang sa naturang lugar ang bangkay upang iligaw ang mga imbestigador nito.
Patuloy ang imbestigasyon ng DID sa magkahiwalay na insidente.