Kuya inutas sa inuman

MANILA, Philippines - Nabalewala ang pagiging magkadugo ng magkapatid makaraang saksakin at mapatay ang 34-anyos na lalaki ng kanyang nakababatang utol sa Quezon City, kamakalawa ng gabi.

Kinilala ni PO2 Alvin Quisumbing ang napa­tay na si George Guasch, may-asawa, negos­yante, ng # 8 Hillcrest compound, E. Rodriguez Blvd. sa Barangay Emmaculate Concepcion.

Samantala, nasakote naman ang suspek na si James Guasch, 33, may-asawa, security guard at nakatira rin sa nasabing lugar.

Sinasabing nakikipag-inuman ang biktima sa kanyang kaibigan nang dumating ang suspek kung saan kinompronta nito ang utol sa pag-inom ng alak sa kanilang lugar.

Humantong sa suntukan ang komprontasyon hanggang sa mapatay sa saksak ang biktima.

Tinangkang tumakas ng suspek subalit nakor­ner naman nina PO2 Jonny Casicas at PO2 Michael Avenis ng Mobile Police Unit.

Nagawa namang maitakbo sa Jose Delgado Hospital ang biktima subalit idineklarang patay na.