Colonel, himalang nakaligtas!

MANILA, Philippines - Himalang nakaligtas at nasa maayos na umanong kondisyon sa ngayon ang isang police colonel matapos na barilin sa kanang sentido na tumagos sa kaliwang mata ng isang lalaki sa loob ng isang bar sa Pasig City, kamakalawa ng gabi.

Kinilala ang biktima na si P/Senior Superintendent Ted Pedronisto Quiaño, chief-of-staff ng Philippine National Police Finance Department sa Camp Crame, Quezon City.

Batay sa ulat ng Pasig City Police, dakong alas-6:00 ng gabi nang maganap ang krimen sa Nippa Hut resto bar sa Henry Javier St. sa Brgy. Oranbo sa Pasig City.

Sinasabing umiinom ang biktima kasama ang isang babae sa loob ng resto bar nang bigla na lang itong lapitan ng suspek na nakasuot ng itim na t-shirt at barilin sa sentido, bago mabilis na tumakas.

Masuwerte namang nakaligtas at nilalapatan na ng lunas sa The Medical City hospital ang biktima.

Iniimbestigahan na ng pulisya ang kaso.