Kinalasan ng nobyo, 16-anyos naglason

MANILA, Philippines - Pinaniniwalaang hindi matanggap ang pakikipagkalas ng kanyang nobyo kaya nagdesisyong lumaklak ng lason ang 16-anyos na estudyante kamakalawa sa Malabon­ City. Idineklarang patay sa Tondo Medical Center ang biktimang si Mary Jane  dela Cruz, mag-aaral sa Malabon­ National High School at nakatira sa Bernadeth St. sa Brgy.  Hulong Duhat ng nasabing lungsod. Sa ulat ng Station Investigation Division (SID) ng Malabon City PNP, dakong alas-4:50  ng hapon nang mamataan ang biktima na nakahandusay sa ikalawang palapag ng ka­nilang bahay­ habang bumubula ang bibig. Ayon sa pulisya, huling­ namataang buhay ang biktima na nakikipagtalo sa kanyang nobyo kaugnay sa pakikipaghiwalay ng lalaki. Natagpuan ng pulisya sa pinangyarihan ng insidente ang botelya na sinasabing may lason na nilaklak ng biktima.