Ex-barangay chairman dedo sa tandem

MANILA, Philippines - Muli na namang nalusutan ng riding-in-tandem ang mga operatiba ng pulisya makaraang pagbabarilin at mapatay ang 41-anyos na dating barangay chairman kahapon ng umaga sa panulukan nbg Villanueva Park Avenue, Pasay City.

Hindi na umabot ng buhay sa San Juan de Dios Hospital dahil sa dalawang tama ng bala ng cal. 45 pistol sa ulo at dibdib ang biktimang si Joseph Saria ng #2495 Villanueva Street sa naturang lungsod.

Sa imbestigasyon ni PO3 Ronald Prades ng Investigation and Detective Management Section, naganap ang krimen dakong alas-6:35 ng umaga kung saan sakay ng motorsiklo ang biktima patungo sa San Rafael Church.

Nabatid na hinarang ng tandem at pinaputukan ang biktima.

Ayon pa sa imbestigasyon na noong ito ang barangay chairman, naglunsad ng kampanya laban sa mga drug pusher at user na maaaring nasa likod ng pamamaslang.

Si Saria ay kasalukuyang naglilingkod bilang barangay kagawad ng Barangay 88 Zone 9 matapos ang kanyang termino bilang barangay chairman kung saan nagpaplano itong muling tumakbo bilang chairman.