14 bahay naabo sa sunog

MANILA, Philippines – May kabuuang 14 na bahay ang naabo sa naganap na sunog kamakalawa ng gabi sa Mandaluyong City.

Sa ulat ng Bureau of Fire Protection ng Mandaluyong City, nabatid na ang sunog ay nagsimula ganap na alas-6:00 ng gabi sa tahanan ng isang Oscar Malloca sa 124 Magalona St., Brgy. Daang Bakal sa nasabing lungsod.

Tumagal ng mahigit isang oras ang sunog na umabot sa ikatlong alarma bago tuluyang naapula ng mga bumbero dakong alas-7:10 ng gabi.

Sinasabing pawang gawa lamang sa kahoy at dikit-dikit pa ang mga tahanan sa nasabing lugar kaya mabilis ang pagkalat ng apoy.

Wala namang naiulat na nasawi o kaya’y nasaktan sa na­sabing sunog na ngayon ay kasalukuyan pang ini­imbestigahan ng mga arson investigator ang pinagmulan nito.