Tricycle driver, itinumba habang namamasada

MANILA, Philippines - Patay sa pamamaril ang isang 24-anyos na tricycle driver na sangkot umano sa mga holdapang nagaganap sa ilang lugar sa Tondo, Maynila, kahapon ng umaga.

Nakilala ang nasawi na si John Ryan Gustin, alyas “JR Tae”, ng Tayuman, Tondo.

Sa ulat, dakong alas-6:00 ng umaga nang maganap ang insidente sa panulukan ng Almeda at Tayuman Sts. sa na­sabing lugar.

Bago ito, nag-aabang umano ng pasahero ang nasawi sa nasabing lugar nang sumulpot sa kanyang harapan ang isang Honda Wave motorcycle sakay ang di-nakilalang suspect nang bigla siyang pinaputukan sa ulo.

Ilang mga tricycle driver naman­ ang nagsasabing sangkot ang biktima sa mga nagaganap na holdapan sa kahabaan ng Tayuman at Abad Santos Avenue.

Patuloy naman ang isinasa­gawang imbestigasyon ng pulisya sa insidente at inaalam ang motibo ng pagpaslang sa biktima.