Mister dedo sa 2 kainuman

MANILA, Philippines - Patay ang isang 52- anyos na mister makaraang pukpukin ng malaking bato sa ulo ng isa sa dalawang suspect na nambugbog sa kanya sa lungsod Quezon kahapon ng madaling araw.

Sa ulat ng Quezon City Police Distict, nakilala ang biktima na si Antonio Gupa, scavenger at naninirahan sa Phase 2 Kaingin 1, Brgy. Pansol sa lungsod. Pinaghahanap naman ang mga suspect na sina Noel Perez at Robert Rebrega, pawang mga residente sa Kaingin 2 ng nasabing barangay.

Nangyari ang insidente sa may eskinita sa kahabaan ng Sapang Pogi, Kaingin 1, ganap na alas -4 ng madaling araw.

Bago ito, masaya umanong nakikipag-inuman ang biktima sa mga suspect sa nasabing lugar nang dumako ang pag-uusap nila tungkol sa LTO driver’s license.

Nabatid na kapwa nagpayabangan ang biktima at mga suspect kung sino ang mas may kaalaman sa lisensya hanggang sa mauwi ito sa mainitang pagtatalo.

Sa kainitan ng pagtatalo, nagpasya ang biktima na umuwi na lang, kaya tumayo ito sa umpukan saka umalis. Pero sinundan siya ng mga mga suspect at habang naglalakad sa naturang lugar ay biglang dumampot ng malaking tipak ng bato ang mga una at pinagtulungang ipukpok sa ulo ng biktima.

Bunga ng malakas na hampas, agad na bumulagta ang biktima saka muling sinaktan ng mga suspect bago tuluyang nagsipagtakas. Narekober ng mga awtoridad sa lugar ang isang malaking tipak ng bato na may mantsa ng dugo na ginamit sa pamamaslang sa biktima. Patuloy ang pagtugis ng CIDU sa nasabing mga suspect.