MANILA, Philippines - Isang notoryus na holdaper ang namatay matapos na barilin ng isang barangay kagawad na nagresponde sa naganap na holdap sa Tondo, Maynila kahapon ng madaling-araw.
Dead-on-the-spot ang suspect na si Kevin John Longinos, miyembro ng ‘Batang City Jail’ at ‘Teardrops gang’ at residente ng Tondo, Manila sanhi ng tinamong tama ng bala ng baril mula kay Al Valezona, Brgy. Kagawad ng Brgy. 108, Zone 9 Dist 1.
Sa report ng MPD, naganap ang insidente dakong alas-12:30 ng madaling-araw sa Capulong St., Tondo.
Nauna rito, humingi ng tulong ang isang Abigael Aquino, 31, negosyante ng Maharlika St., Tondo kay Valezona matapos na holdapin ng suspect at tangayin ang kanyang Blackberry cellphone.
Tumugon naman si Valezona kasama ang kanyang barangay tanod kung saan sakay ng patrol service at naabutan nila ang suspect sa nasabing lugar.
Nang sitahin ng kagawad ang suspect ay nagtatakbo ito hanggang sa nagkaroon ng habulan at umakyat sa bubong ang huli pero minalas na mahulog kaya naaresto ito.
Sa halip na sumuko ang suspect ay binunot nito ng kanyang kalibre 45 na baril kung saan nakipag-agawan naman si Valezona at nang makakuha ng tiyempo ang huli ay pinaputukan ang una.
Nalaman na bukod sa biktimang si Aquino, positibo pa ring kinilala ang suspect ng isa pa niyang nabiktima.
Nabatid na labas-pasok sa Manila City Jail ang suspect at kilalang kilabot na holdaper sa lugar.