SUV nagliyab sa kalye

MANILA, Philippines - Isang sports utility vehicle ang nagliyab habang binabagtas ang kahabaan ng Kamias Road sa lungsod Quezon, kahapon ng hapon.

Ayon sa ulat, umusok muna bago tuluyang nagliyab ang Ford Escape 2004 model (XPE-861) na minamaneho ng isang Ariel David habang tinatahak ang kanto ng Kalayaan Avenue at Kamias Road ganap na ala-1:40 ng hapon.

Ayon kay David, nakatakda sanang ihatid niya sa bahay ng may-ari nito na si Dr. Ri­chard­­­ Inocencio sa may Tomas Morato ang sasakyan matapos kunin sa isang talyer sa Marikina subalit bigla itong nagliyab.

Maagap namang nakalabas ng naturang kotse si David kung kaya nakaligtas ito sa posibleng pagkakasunog.

Mabilis na naapula ang sunog sa tulong ng ilang residente na nagpahiram ng fire extiguisher­.

Hinala ng BFP, posibleng sa wiring ng sasakyan nagsimula ang apoy habang inaalam ang pinag-ugatan nito.